RAVKAI TATNIMEI GE (LAM/THOUC)

(Mi blogpost hei Mukti Namdai Baptist Church tuang KaanpatNgai-KaithanKumei-Jubilee Celebration tuang Souvenir khou contribute sulou mei article e. Posted with permission. For an English version mi khou click/tap sulou nu e.)

Aniu namdic hei Khristian riak tatchuy mak bam sinic Khristian ningmei raana dithe. Aseikum hei, aniu kapumna Khristian ningmei raana dithe tuna “Kaanpatmei Ngai,” raengclou bam the. Howzat zat makmei Ravkai gayhak meine kasiamh luailou bamthe! Tiki aniu Ravkai khatni Ravkai kunimei ge thay minc bam dai cho? Samlapna khou, Nang Ravkai kulinhg/tatlingh bam dai cho? Mei nche (article/latdin) khou Ravkai tatnimei ge kathay ncham kho.

Reymei khou, Ravkai tabui cho tumei zaengrui:

Khristian ningmei guay hei paapc kandic khou rui Ravkai lungc khou kau lou tuang e. Mi Ravkai kiu Poubaumei Jisu Khrista pumc kahak kiu the! Khristian ningmei guay, (kaganv kathuic, kabamv kathuic, zaatc kathuic) Khrista Pumc, Ravkai tumei khou bam e (1Korinthian 12:12-13). Ravkai khou kazauh makna, meic Khristian sw makge! Khristian kathuic hei Khrista khang e, khatnic Khrista khou bam e.

Kummetiki, mikrui howmei phwamling, thing-ntauh rui kasiamh loumei Ravkai, Khristian ningmei guay rui kubammei ninai e. Kabamv azuh khou, mik rui howmei Ravkai peyna nai e.  “Tiki, mik rui howmei Ravkai the tuna sana bam mei guay ko Ravkai ling day cho?” tuna thanv khang ni nai e. Baibal, Kathancmei Latding khou mikrui howmei Ravkai peyna nai e. Kathaichuymei nunc ruina Ravkai twna kau khang key nganvmei khou kalangv kathumh taanv, taanc nina e tuna sa e: 1. Ravguangc lat (Baibal) dinhmei 2. Kristian thiak suihmei (Duilupmei khatni Maniak taektw) 3. Sinriapmei. (Matthiu 18:15-20 kathai lou pu o).

Heizaengrui, kabamv akhat khou Baibal kathai nchamcmei phwam, kai akhat khou Rakalum kariumei, hamhethei kamung akhat khou dungc kariumei, twmei guay hei Ravkai twna kau khang kazi makge. Internet, YouTube khou Baibal pary nkingmei, hamhethei TV khou Ravkai service zaohmei, twmei guay hei– Ravkai, meictuang phwamling khou kumei lev khatse nchammak ge. Kapaengc-kazaengc khou bam mei guay nunc rui mi hei kakhanh chuy lou o.

Kaneimei khou, Ravkai lwnlung zaengrui:

Ravkai lwnlung zauc pukhou, Khristian kathuic Ravkai kulingh nina e. Ravkai (Phwamling) hei teipumc (meipum) kumcna ring e. Kristian kathuic, meic-sing khang Bumaeng kaipat kei-nganv mei khou akhat khat nai e. Aposal Paul ruina 1Korintian 12:12-31 khou, Khristianmei nunc ta meipumc nanu khang kida lou e: Khristian asaek hei, meimik e tei, asaek rui nukuanc, baanh, tan, le na e. Aniu Khrista pumc khou e; Kamei rui Kapi the. Aniu khat khat khang pumhsuna ringh khang siamruai sw kari nina e.

Aniu asaek meizak makna kumsa e, “Ravkai tatmei guay ko kumhmei khiatnahmei naibo? Nchamc rap! Tingkao tatnimei, meicram, lum lum ruideh! Ganvkhat ta latzan suri o!” Tikih, ringhmei malav nuh-makmei Ravguangc lat ruina tho, nang, ai Khrista pumc khou bam nina e tuna dinclou e. Nukuancna swna, hamhethei, mikna suna ringc bammei mak e. Jared C. Wilson rui, “Nguay, Aniu meira meirana swna kanloumei/ ringhbamv phang e (khristian su e), tikih meira meirana Khristian ningni nimei thiak khou ningkhang hamhmak e” tuna saamei tei nchumh e!

Asaek rui meizakna sa e, “Ai kumhmei rui tabui siamruai sungam, sw thayna cho!?” Nchumh nana Ravkai khou guangmeina sinina peyna khang siamruai e twmei, zaengayhakna thaylou o. Ravkai khou, mei guang rauna, dungc nru rangh rang bam ethei, mansei guang dungc bammei guay, thith thithna, zaengsina dungc bam tanc e. Kalingsa pw khou, tingsi, neihsu, puanlu, ganhkey, khumngai, lat-lu naibam sini, Ravkai khou guang tanh tanmei guay ta howna peyna khang lungning mik rak gaanc kah kah e. Neihla e, nzian e, pian e. Ravkai guangmei zaengrui, heikummei gay kanmei ta malaa rio. Machunh o.

Heininai e twmeithu, kapahloumei/langloumei Ravkai Gaanthaih nunc hei Phwamlingmei nunc ta lauziugaengpou kumc gaengclou khang e. Kaniu rui dinclou, zaylou, makavlou, nchamlou nina e– phwamling taanv taanc thuih ngam khang. (Ephesiamei 4:7-16). Ravkai kulingmei nunc rui Khrista lwn luicna daicthau puni e. Ibrimei 13:17 khou hylou e, “Nangniw ta zayloumei nunc lat tei piu o. Kaniwbangc khou bam o. Kaniw tuang taanv chakh tei kaniw Ravguangc khou tiini la pui zaeng rui, kaniw nangniw bumaengc ta kadanna zauc bam tuang e. Kaniw neihlana taanc bam khang latpiu o. Kaniw chwn sw ryanrana taanc e thei hei tei nangniw khang gaengmak ge.” Aniu Ravkai tatmei hei Ravguangc rui chakbam e.

Kathumhmei khou, Ravguangc lat rui katiumei zaengrui:

Ibrimei 10:24-25 khou kumna katiulou e, “Nzian thay khang khatni gaytaanv taanc thay khang khatkhat ta akumhna katiu thau kho cho twmei kakhanh kho. Meic gaanv saekc kaniw chav sw bammei tei kumcna, aniu guang kariumei khoun taamv rikho. Poubauhmei tuang Tingmik anaguang the twmei nangniw howpui thei layna aniu khat khat ta katiu thau mbu hay hay bam di kho.”“Ntaamvrikho” (v.25) tuna sabammei hei, kum tanctipui zaeng rui e. Ravkai guang-nliauhmei, guang makmei nai geic tipui zaeng rui e. Kaling sa pwkhou, nang, ai ne aliauh hak thao rapmei neic tho nai ding e. Asaekc tho Ravkai guang makmei kacha sw the (aniu tingzin Ravkai guang rau meikum). Khatzat tho sa e thei, Paul ruina kum sa tuang e, “Ravkai guang tanh tan kho!” Guangliang guat, kanei meita hamh e, tiki guang tanh tanmeita e. Ravkai ku alingh nina e.

          Ravkai guang nini mei ganv khou guangna, tat dat, khangni hamh makge. Mansei “guayna guang kariu” nina e (v25). Khat khat ta ntinna thay nina e. (Ntinna thay mak ge thei, ntinna thay mak san guang kariu ni tuang e.) Aniu guang kariumei hei khat khat ta katiu thau karih khang ni e. Ravkai khou reireina dungna tat dat tumei hei ravchap tat duhmei nunc thiak hamh e, aniu Ravguangc tani kachuc, Ravguangc lat ni nking, khat khat ta ni kachuc ni tuang e. Kum pu khou rui aniu “nzian thay” khatni “gaytaanv taanc” pat geicpuni (v.24).

Luaimei khou, aniu mi lat than kho, “Nang, ai Khristian sw khang (tingkao ku khang) Ravkai tat tanh tan ni tuang cho?” Meiko changh tho hamh makge! Nnaumei guay Ravkai guang ngam makmei gan nai e. Ravchap tatmei Doctors nunc guay ni, meicpui nah puanc nimei nai ethei, Ravkai khou rui sini katum kaluakna mipui daeng tho nkhav lou khang tat re. Tikih Kristianmei de tuna sana, pumhgay lana Ravkai guang hak makmei nunc tei tho, kaniu Khristian ling hamh makmei ram lung e. Aniu Khristianmei nunc Khrista rui kunghmei Phwamling ta nzianna Kalumlu hymeipu kumna, sa lak na cho, “Ai RINGHPOUC khou ramh khat ney e; ramh khatna ai kahaw e: ai ringh saanv RINGHPOUC kai khou bam khang, mi khou tei karamgay ta makumh bam khang, khatni kamei rui zaylou khang ney bam khang e” (Kalumlu 27:4); “Nang tuang Ravkai khou zaeng neihkhat bam lou mei hei; kabamv baih thangc zaeng 1000 bammei suangc gay e. Ai mu meicsimei kai khou lungc bammei suangc, aRacguangc kai kaimun nkhwanmei sw kannii e” (Kalumlu 84:10)?


Ronglat khou hilou mei asaek hei ni palou nu e:
1. BAIBAL PAC NI KIH PAC THUYLAK E TA (If You Struggle To Read The Bible)
2. RAVKALUM LINGH NI KIH KALUM THUYLAK E THEI... (If You Struggle To Pray)